இராமநாதபுரம்: டிசம்பர் 26 உள்ளூர் விடுமுறை... கலெக்டர் அறிவிப்பு!

டிசம்பர் 26ம் தேதி, ராமநாதபுரம் மாவட்டத்தில் அருள்மிகு ஸ்ரீமங்களநாத சுவாமி திருக்கோவில் ஆருத்ரா தரிசன திருவிழாவை முன்னிட்டு  உள்ளூர் விடுமுறை அறிவித்து அம்மாவட்ட ஆட்சியர் உத்தரவிட்டுள்ளார். டிசம்பர் 26ம் தேதி ராமநாதபுரம் மாவட்டத்தில் உள்ள அனைத்து பள்ளி, கல்லூரிகளுக்கும் விடுமுறை அறிவிக்கப்பட்டுள்ளது. அன்றைய தினம், அரசு அலுவலகங்கள் இயங்காது. எனினும், குறைந்த பணியாளர்களுடன் அரசு கருவூலங்கள் போன்ற முக்கிய அலுவலகம் இயங்கும். இந்த விடுமுறையை இடிஉசெய்யும் வகையில் ஜனவரி 6ம் தேதி வேலை நாளாக அறிவிக்கப்பட்டுள்ளது. 

ராமநாதபுரம் மாவட்டம் திருஉத்தரகோசமங்கை கிராமத்தில் மிகவும் பழமையான கோவிலான மங்களநாதர் கோவில் அமைந்துள்ளது. ராமநாதபுரம் சமஸ்தானம் கட்டுப்பாட்டில் உள்ள இந்த கோவிலில் மரகத நடராஜர் சன்னதி அமைந்துள்ளது. ஆண்டுதோறும் இந்த கோவிலில் உள்ள மரகத நடராஜர் சன்னதியானது ஆருத்ரா திருவிழா அன்று ஒரு நாள் மட்டுமே திறக்கப்படும்.

அந்த வகையில் இந்த வருடம் ஆருத்ரா திருவிழா வரும் 26-ம் தேதியன்று நடைபெறவுள்ளது. இந்த திருவிழாவிற்கு பல்லாயிரக்கணக்கான மக்கள் கோவிலுக்கு வந்து சாமி தரிசனம் செய்வார்கள். எனவே வரும் 26-ம் தேதியன்று ராமநாதபுரம் மாவட்டத்திற்கு விடுமுறை அளிக்கப்பட்டுள்ளது.

இதுகுறித்து ராமநாதபுரம் மாவட்ட ஆட்சியர் விஷ்ணு சந்திரன் வெளியிட்டுள்ள அறிக்கையில், ராமநாதபுரம் மாவட்டம், கீழக்கரை வட்டம், திருஉத்திரகோசமங்கை கிராமத்தில் உள்ள அருள்மிகு ஸ்ரீமங்களநாதசுவாமி திருக்கோவிலில் ஆருத்ரா தரிசனம் திருவிழா நடைபெறுவதை முன்னிட்டு வரும் 26-ம் தேதி செவ்வாய்க்கிழமை ஒருநாள் மட்டும் ராமநாதபுரம் மாவட்டம் முழுவதும் உள்ளூர் விடுமுறை ஆகவும், அதனை ஈடு செய்யும் பொருட்டு ஜனவரி 6-ம் தேதி சனிக்கிழமை வேலை நாளாகவும் அறிவிக்கப்படுகிறது.

மேலும் ராமநாதபுரம் மாவட்டத்தில் உள்ள அனைத்து அரசு அலுவலகங்களும் ஜனவரி 6-ம் தேதி அன்று வழக்கம்போல் இயங்கும். இந்த உள்ளூர் விடுமுறை நாள் செலாவணி முறிச்சட்டம் 1881-ன் கீழ் அறிவிக்கப்படவில்லை என்பதால், டிசம்பர் 26-ம் தேதி செவ்வாய்க்கிழமை அன்று ராமநாதபுரம் மாவட்டத்திலுள்ள கருவூலம், சார்நிலை கருவூலங்கள் மற்றும் அனைத்து அரசு அலுவலகங்களும் அரசு பாதுகாப்பிற்கான அவசர அலுவல்களைக் கவனிக்கும் பொருட்டு குறிப்பிட்ட பணியாளர்களோடு செயல்படும், என்று தெரிவிக்கப்பட்டுள்ளது.  

மார்கழிக் கோலத்தில் மட்டும் பூசணிப்பூ வைப்பது ஏன்?!

மார்கழி மாதத்தில் இந்த தவற மட்டும் செய்யாதீங்க!

மார்கழி மாதத்துக்கு இத்தனை சிறப்புகளா? விரதமுறை, பலன்கள்!!

மார்கழி மாதம் ஏன் திருமணம் செய்யக்கூடாது... பிரமிக்க வைக்கும் விஞ்ஞான உண்மைகள்!