REWIND 2025: கள்ளச்சாராய பேரழிவு, கரூர் கூட்டநெரிசல், கவின் படுகொலை என தமிழகத்தை உலுக்கிய அதிர்ச்சிச் சம்பவங்கள்!

2025ம் ஆண்டு தமிழக வரலாற்றில் மறக்க முடியாத பல துயரச் சம்பவங்கள் அரங்கேறியுள்ளன. குறிப்பாக கள்ளக்குறிச்சி கள்ளச்சாராயத் துயரம் முதல் ஆணவப் படுகொலைகள் வரை, தமிழக மக்கள் அதிகம் விவாதித்த மற்றும் சமூக வலைதளங்களில் அதிகம் பகிரப்பட்ட, தமிழகத்தையே உலுக்கிய முக்கியக் குற்றச் சம்பவங்களை தொகுத்திருக்கிறோம். பல சம்பங்களுக்கு ஜாதி, மத வெறியும், போதைப் பழக்கமும் காரணமாக இருப்பதாக தெரிய வந்துள்ளது. 

கள்ளக்குறிச்சி கள்ளச்சாராயப் பேரழிவு:

தமிழக வரலாற்றிலேயே மிக மோசமான துயரங்களில் ஒன்றாக இது பதிவானது. கள்ளக்குறிச்சி மாவட்டம் கருணாபுரத்தில் மெத்தனால் கலந்த கள்ளச்சாராயத்தை அருந்தியவர்களில் 69 பேர் அடுத்தடுத்து உயிரிழந்தனர். சுமார் 200-க்கும் மேற்பட்டோர் கண்பார்வை பாதிப்பு மற்றும் உடல்நலக் குறைபாட்டுடன் மருத்துவமனையில் அனுமதிக்கப்பட்டனர். இந்தச் சம்பவம் மாநிலம் முழுவதும் போராட்டங்களை வெடிக்கச் செய்ததுடன், கோட்டை வரை அதன் எதிரொலி கேட்டது. மாவட்ட ஆட்சியர் மற்றும் எஸ்.பி மீது அதிரடி நடவடிக்கை எடுக்கப்பட்டு, வழக்கு சி.பி.ஐ - சி.பி.சி.ஐ.டி வசம் ஒப்படைக்கப்பட்டது.

அஜித்குமார் மரணம்: 

காவல் நிலையக் கொடூரம்: சிவகங்கை மாவட்டம் திருப்புவனத்தைச் சேர்ந்த காவலாளி அஜித்குமார், கார் திருட்டுப் புகாரில் விசாரணைக்கு அழைத்துச் செல்லப்பட்டு, போலீசாரின் கொடூரத் தாக்குதலால் உயிரிழந்தார். அவரது உடலில் 50-க்கும் மேற்பட்ட காயங்கள் இருந்ததாகக் கண்டறியப்பட்டது. இந்தச் சம்பவம் தேசிய அளவில் அதிர்ச்சியை ஏற்படுத்தியதைத் தொடர்ந்து, வழக்கு சி.பி.ஐ.-க்கு மாற்றப்பட்டு, சம்பந்தப்பட்ட போலீசார் கைது செய்யப்பட்டனர்.

கவின் படுகொலை - சாதிய வன்மம்:

திருநெல்வேலியில் மென்பொருள் பொறியாளர் கவின், தனது காதலியின் சகோதரரால் பட்டப்பகலில் வெட்டிப் படுகொலை செய்யப்பட்டார். காதலியின் பெற்றோர் காவல்துறையில் பணியாற்றுபவர்கள் என்பதும், சாதி மறுப்புத் திருமண முயற்சியே இந்தக் கொலைக்குக் காரணம் என்பதும் உறுதி செய்யப்பட்டது. இது தமிழகத்தில் 'ஆணவப் படுகொலை'களுக்கு எதிரான விவாதத்தை மீண்டும் தீவிரப்படுத்தியது.

கரூர் கூட்ட நெரிசல் - 41 உயிர்கள் பலி:

செப்டம்பர் 27 அன்று கரூரில் நடைபெற்ற ஒரு அரசியல் பொதுக்கூட்டத்தின் போது ஏற்பட்ட பயங்கரக் கூட்ட நெரிசலில் சிக்கி 41 பேர் உயிரிழந்தனர். 100-க்கும் மேற்பட்டோர் காயமடைந்தனர். கூட்டத்தைக் கட்டுப்படுத்துவதில் ஏற்பட்ட தோல்வி மற்றும் போதிய பாதுகாப்பு ஏற்பாடுகள் இல்லாததே இதற்குக் காரணம் எனக் கூறி எதிர்க்கட்சிகள் கடும் கண்டனம் தெரிவித்தன.

ரிதன்யா தற்கொலை - வரதட்சணை அரக்கன்:

திருப்பூர் மாவட்டம் கைகாட்டிபுதூரைச் சேர்ந்த ரிதன்யா, திருமணமான 78 நாட்களில் வரதட்சணை கொடுமையால் காரிலேயே தற்கொலை செய்துகொண்டார். அவர் சாவதற்கு முன்னதாகத் தந்தைக்கு அனுப்பிய ஆடியோ ஆதாரம், தமிழகத்தின் பல குடும்பங்களில் மறைந்திருக்கும் வரதட்சணைக் கொடுமையின் கோர முகத்தை வெளிச்சம் போட்டுக் காட்டியது.

கடலூர் ரயில் விபத்து - கவனக்குறைவு தந்த மரணம்:

ஜூலை 8 அன்று கடலூரில் ஒரு ஆளில்லா ரயில்வே கேட்டைப் பள்ளி வாகனம் கடந்தபோது, பயணிகள் ரயில் மோதி 3 குழந்தைகள் பலியாகினர். ஓட்டுநரின் கவனக்குறைவு மற்றும் ரயில்வே கேட் பாதுகாப்பு அம்சங்கள் குறித்தப் பெரிய விவாதங்களை இந்த விபத்து உருவாக்கியது.

ஆன்லைன் வர்த்தக மோசடி - ரூ. 2,600 கோடி சுருட்டல்:

கோவையைத் தலைமையிடமாகக் கொண்டு செயல்பட்ட 'மை வி3' (My V3) என்ற நிறுவனம், விளம்பரங்களைப் பார்ப்பதன் மூலம் பணம் சம்பாதிக்கலாம் என ஆசை காட்டி, மக்களிடமிருந்து சுமார் 2,600 கோடி ரூபாயைச் சுருட்டியதாகப் புகார்கள் எழுந்தன. ஆயிரக்கணக்கான பாதிக்கப்பட்ட மக்கள் போராட்டங்களில் ஈடுபட்டது இந்த ஆண்டின் மிகப்பெரிய நிதி மோசடியாகப் பார்க்கப்படுகிறது.

சென்னையில் ஓடும் ரயிலில் மாணவி தள்ளிக் கொலை:

சென்னையில் ஒரு மாணவியை ஒருதலைக் காதலால் ஓடும் ரயிலில் தள்ளிவிட்டுக் கொலை செய்த சம்பவம் பெரும் பரபரப்பை ஏற்படுத்தியது. பொது இடங்களில் பெண்களின் பாதுகாப்பு குறித்த கேள்வியை இது மீண்டும் எழுப்பியது.

கோவை கூட்டுப் பாலியல் வன்கொடுமை:

கோவை மாநகரில் கல்லூரி மாணவி ஒருவரை மூன்று பேர் கொண்ட கும்பல் கடத்திச் சென்று பாலியல் வன்கொடுமை செய்த சம்பவம், தமிழகத்தையே அதிர்ச்சியில் உறைய வைத்தது. இந்தக் கொடூரச் செயலில் ஈடுபட்டவர்களைப் பிடிக்கப் போலீசார் நடத்திய துப்பாக்கிச் சூடு சம்பவம் பெரும் விவாதங்களை உருவாக்கியது.

ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!

வீடியோ!  5 அடி முதலையை விழுங்கும் மலைப்பாம்பு!!

வீடியோ! ராஜநாகத்துடன் ஆக்ரோஷமாக சண்டையிடும் கோழி!!

உங்க ராசிக்கேற்ற தொழில் எது? இந்த துறை அதிக லாபம் தரும்

லட்சத்துல கடன் இருந்தாலும் ஈஸியா தீர்க்கும் எளிய பரிகாரம்!