தமிழுக்கு ₹30 கோடி - சமஸ்கிருதத்துக்கு ₹2000 கோடியா? - அமைச்சர் ஐ.பெரியசாமி
திண்டுக்கல்லில் நடைபெற்ற அரசு விழாவில் பங்கேற்ற அமைச்சர் ஐ.பெரியசாமி, தமிழகத்திற்கு வரவேண்டிய நிதி உரிமைகள் மறுக்கப்படுவது குறித்து பேசினார். மத்திய அரசு சமஸ்கிருத மொழி ஆய்விற்காக சுமார் ₹2000 கோடி வரை நிதி ஒதுக்குகிறது. ஆனால், உலகத்தரம் வாய்ந்த தமிழ்ச் செம்மொழி ஆய்வு நிறுவனத்திற்கு ₹30 கோடி கூட முறையாக வழங்கப்படுவதில்லை என அவர் சாடியுள்ளார்.
கல்வித்துறை மற்றும் 100 நாள் வேலை வாய்ப்புத் திட்டம் போன்ற மிக முக்கியமான துறைகளுக்குத் தமிழகத்திற்கு வர வேண்டிய நிலுவைத் தொகையை மத்திய அரசு இன்னும் விடுவிக்கவில்லை என்று அவர் குற்றம் சாட்டியுள்ளார். மத்திய அரசு நிதி வழங்கத் தாமதித்தாலும், முதியோர் ஓய்வூதியம் உள்ளிட்ட சமூக நலத்திட்டங்களுக்குத் தமிழக அரசே நிதி ஒதுக்கி, அவற்றைச் தொய்வின்றிச் செயல்படுத்தி வருவதாக அவர் பெருமிதத்துடன் குறிப்பிட்டார்.
மத்திய கலாச்சார அமைச்சகத்தின் முந்தைய தரவுகளின்படி, கடந்த சில ஆண்டுகளில் சமஸ்கிருத மேம்பாட்டிற்காக ஒதுக்கப்பட்ட நிதிக்கும், தமிழ் உள்ளிட்ட பிற செம்மொழிகளுக்கு ஒதுக்கப்பட்ட நிதிக்கும் இடையே பெரும் இடைவெளி இருப்பது நாடாளுமன்றக் கேள்விகளின் பதில்கள் மூலம் உறுதியாகியுள்ளது. குறிப்பாக, வாரணாசி மற்றும் டெல்லியில் உள்ள சமஸ்கிருத பல்கலைக்கழகங்களுக்கு அதிக நிதி ஒதுக்கப்படுவது குறிப்பிடத்தக்கது.
சென்னையில் செயல்பட்டு வரும் இந்த நிறுவனத்திற்கு ஆண்டுதோறும் ஒதுக்கப்படும் நிதி, அதன் உள்கட்டமைப்பு மற்றும் ஆய்வுப் பணிகளுக்குப் போதுமானதாக இல்லை எனத் தொடர்ந்து புகார்கள் எழுந்து வருகின்றன.
2026-ம் ஆண்டு மத்திய பட்ஜெட்டிற்கு முன்னதாக, தமிழகம் உள்ளிட்ட பல எதிர்க்கட்சிகள் ஆளும் மாநிலங்கள், ஊரக வேலைவாய்ப்புத் திட்டத்திற்கான நிலுவைத் தொகையை உடனடியாக விடுவிக்கக் கோரி டெல்லியில் அழுத்தம் கொடுத்து வருகின்றன.
"ஒன்றிய அரசிடம் இருந்து வரவேண்டிய ஜிஎஸ்டி இழப்பீடு மற்றும் பிற வரிப் பங்கீடுகளில் தமிழகம் தொடர்ந்து வஞ்சிக்கப்படுகிறது" என்ற கருத்தை முதல்வர் மு.க.ஸ்டாலின் உள்ளிட்ட அமைச்சர்கள் பல்வேறு மேடைகளில் தொடர்ந்து பதிவு செய்து வருகின்றனர்.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!