தாமிரபரணி தடுப்பணையில் திடீர் விரிசல்... நெல்லை, தென்காசியில் பெரும் பதற்றம்!
வடகிழக்குப் பருவமழை மிகத் தீவிரமடைந்துள்ள நிலையில், திருநெல்வேலி மற்றும் தென்காசி மாவட்டங்களில் பெய்து வரும் அதி கனமழையால் தாமிரபரணி ஆற்றில் வெள்ளப்பெருக்கு ஏற்பட்டுள்ளது. இந்தத் தொடர் கனமழை காரணமாக, தென்காசி மாவட்டத்தில் உள்ள ஒரு தடுப்பணையின் சுவரில் திடீரெனப் பெரிய விரிசல் ஏற்பட்டுள்ளதால், கரையோர கிராம மக்கள் மத்தியில் பெரும் பதற்றம் நிலவுகிறது.
மேற்குத் தொடர்ச்சி மலைப் பகுதிகளில் பெய்த மிக அதிக கனமழை காரணமாகத் தாமிரபரணி ஆற்றில் நீர்வரத்து விநாடிக்கு 25,000 கன அடிக்கும் மேல் உயர்ந்துள்ளது. வங்கக் கடலில் உருவாகியுள்ள 'டிட்வா' புயலின் தாக்கமும் தென் மாவட்டங்களில் கனமழையைத் தொடர்ந்து கொடுத்து வருவதால், இந்திய வானிலை ஆய்வு மையம் இந்த இரு மாவட்டங்களுக்கும் ஆரஞ்சு எச்சரிக்கை விடுத்துள்ளது.
தென்காசி மாவட்டத்தில் மஞ்சோலை, ஊத்து உள்ளிட்ட மலைப் பகுதிகளில் 200 மி.மீ-க்கு மேல் மழை பதிவாகியுள்ளது. இந்த மழை வெள்ளம் அனைத்தும் தாமிரபரணி ஆற்றுடன் இணைந்ததால், வெள்ளம் கரைபுரண்டு ஓடுகிறது.
இந்தச் சூழலில், தென்காசி மாவட்டம் திடீயூர் அருகே தமிழா குறிச்சி பகுதியில் உள்ள தாமிரபரணி தடுப்பணையில் பெரும் ஆபத்து ஏற்பட்டுள்ளது. அணை முழுமையாக நிரம்பி 45 அடிக்கு மேல் தண்ணீர் தேங்கியுள்ள நிலையில், திடீரென அணைக்கட்டின் சுவரில் ஒரு பெரிய விரிசல் ஏற்பட்டு, அதிலிருந்து தண்ணீர் வெளியேறத் தொடங்கியுள்ளது.
இந்த விரிசல் மேலும் பெரிதாகி அணை உடைந்தால், அருகில் உள்ள செங்குளம் உள்ளிட்ட மூன்று கிராமங்கள் முழுமையாக வெள்ளத்தில் மூழ்கும் அபாயம் ஏற்பட்டுள்ளது.
இதனைக் கண்டு பீதியடைந்த தமிழா குறிச்சி மற்றும் அதனைச் சுற்றியுள்ள கிராம மக்கள், அரசு உடனடியாக அணைத் தண்ணீரைத் திறந்துவிட வேண்டும் என்றும், விரிசலை உடனடியாகச் சரிசெய்ய நடவடிக்கை எடுக்க வேண்டும் என்றும் வலியுறுத்திச் சாலை மறியல் போராட்டத்தில் ஈடுபட்டனர்.
இதையடுத்து, மாவட்ட நிர்வாகம் தாமிரபரணி கரையோர கிராமங்களுக்கு வெள்ள எச்சரிக்கை விடுத்து, மக்களைப் பாதுகாப்பான இடங்களுக்கு மாற்றி, மீட்பு முகாம்கள் அமைக்கும் பணிகளில் ஈடுபட்டு வருகிறது. கனமழையும், அணை உடைப்பு அபாயமும் ஒரே நேரத்தில் ஏற்பட்டிருப்பது தென்காசி மற்றும் நெல்லை மாவட்ட மக்களிடையே கடுமையான பதற்றத்தை ஏற்படுத்தியுள்ளது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!