"இந்தியாவிலேயே பெண்களுக்குப் பாதுகாப்பான மாநிலம் தமிழ்நாடுதான்!" - அமைச்சர் ரகுபதி பெருமிதம்
தமிழகச் சட்டமன்றத்தில் இடைக்கால நிதிநிலை அறிக்கை மீதான விவாதத்தின் போது, சட்டம் ஒழுங்கு மற்றும் குற்றச் சம்பவங்கள் குறித்து ஆளும் தரப்பிற்கும் எதிர்க்கட்சிக்கும் இடையே காரசாரமான விவாதம் நடைபெற்றது.
எதிர்க்கட்சித் தலைவர் எடப்பாடி பழனிசாமி பேசுகையில், "தமிழகத்தில் போதைப்பொருள் புழக்கம் அதிகரித்துவிட்டது. இதன் காரணமாகப் பல்வேறு குற்றச் சம்பவங்கள் தடையின்றி நடைபெறுகின்றன. தமிழகத்தில் சட்டம் ஒழுங்கு சீர்குலைந்துவிட்டது" எனக் குற்றம்சாட்டினார். இந்தக் குற்றச்சாட்டை மறுத்துப் பேசிய சட்டத்துறை அமைச்சர் ரகுபதி, "இந்தியாவிலேயே சட்டம் ஒழுங்கு சிறப்பாகப் பராமரிக்கப்படும் மாநிலம் தமிழ்நாடுதான். குறிப்பாகப் பெண்களுக்குப் பாதுகாப்பான மாநிலமாகத் தமிழகம் திகழ்கிறது."
"மற்ற மாநிலங்களுடன் ஒப்பிடுகையில் தமிழகத்தில் குற்றச் செயல்கள் மிகவும் குறைவு. ஆனால், மக்கள் மத்தியில் ஒருவித பீதியை உண்டாக்க அதிமுகவினர் தொடர்ச்சியாக முயற்சி செய்து வருகின்றனர். மக்களிடம் விழிப்புணர்வு ஏற்பட்டுள்ளதால், எவ்வித பயமுமின்றிப் புகார் அளிக்க முன்வருகிறார்கள். அரசு அவர்களுக்கு அளித்த தைரியமே இந்தப் புகார்கள் அதிகரித்திருப்பதாகத் தெரிவதற்குக் காரணம்" என்று விளக்கமளித்தார்.
தமிழகத்தில் 6,999 போக்சோ வழக்குகள் இருப்பதாக எடப்பாடி பழனிசாமி சுட்டிக்காட்டியதற்கு, சமூக நலத்துறை அமைச்சர் கீதா ஜீவன் புள்ளிவிவரங்களுடன் பதிலளித்தார். "2012-ஆம் ஆண்டிலிருந்து இன்று வரை தீர்ப்பு வழங்கப்பட்ட வழக்குகளின் மொத்த எண்ணிக்கைதான் 6,999. தமிழகத்தில் குழந்தை திருமணங்களும் போக்சோ சட்டத்தின் கீழேயே பதிவு செய்யப்படுகின்றன. இதனால்தான் புள்ளிவிவரங்கள் அதிகமாகத் தெரிகிறது. உண்மையில், குற்ற நிகழ்வுகள் குறைவாக உள்ள முதல் ஐந்து மாநிலங்களில் தமிழ்நாடு நான்காவது இடத்தில் உள்ளது" என அமைச்சர் கீதா ஜீவன் தெளிவுபடுத்தினார். தமிழக அரசின் இந்த விளக்கத்தின் மூலம், சட்டம் ஒழுங்கு விவகாரத்தில் அரசு மிகுந்த கவனத்துடன் செயல்படுவதாக அமைச்சர்கள் உறுதிப்படுத்தியுள்ளனர்.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!