அதிர்ச்சி ரிப்போர்ட்: தமிழ்நாட்டில் குழந்தை பிறப்பு விகிதம் 18% சரிவு!
தமிழ்நாட்டில் கடந்த 6 ஆண்டுகளில் குழந்தை பிறப்பு விகிதம் 18 சதவீதம் வரை வீழ்ச்சி அடைந்துள்ளதாக ஆய்வறிக்கையில் அதிர்ச்சித் தகவல் வெளியாகி உள்ளது. தேசிய அளவில் பிறப்பு விகிதம் அதிகரித்து வரும் நிலையில், தமிழ்நாட்டில் மட்டும் இந்தச் சரிவு காணப்படுவதற்கான முக்கியக் காரணங்கள் குறித்து மக்கள் தொகை நிபுணர்கள் விளக்கம் அளித்துள்ளனர்.
1990ம் ஆண்டுகளுக்கு முன்பு வரை திருமணத்திற்குப் பிறகு விரைவிலேயே 2 அல்லது 3 குழந்தைகள் பெற்றுக் கொள்வது தமிழகத்தில் இயல்பாக இருந்தது. ஆனால், தற்போது நிலைமை முற்றிலும் மாறியுள்ளது. இதற்கான முக்கியக் காரணங்கள்: பெண்களின் கல்வித் தரம் உயர்ந்துள்ளதால், வேலைக்குச் செல்லும் பெண்களின் எண்ணிக்கையும் கணிசமாக அதிகரித்துள்ளது. கல்வியின் காரணமாகத் திருமண வயது அதிகரித்துள்ளது. இதனால், குழந்தை பெறும் காலம் தள்ளிப் போகின்றது.
குடும்ப நலத் திட்டங்கள், கருத்தடை வசதிகள் மற்றும் மகப்பேறு விழிப்புணர்வுச் சேவைகள் தமிழகத்தில் முன்பே தீவிரமாகச் செயல்படுத்தப்பட்டன. நகரமயமாக்கல், கல்விப் போட்டி மற்றும் வேலைவாய்ப்பு அழுத்தம் ஆகியவை பிற மாநிலங்களை விடத் தமிழகத்தில் அதிகமாக இருப்பது ஒரு காரணமாகும்.
தற்போதைய பெற்றோர்கள், குழந்தை வளர்ப்பில் கல்வி, சுகாதாரம், மற்றும் எதிர்கால வாழ்க்கைத்தரம் ஆகியவற்றுக்கு அதிக முக்கியத்துவம் கொடுக்கத் தொடங்கியுள்ளனர். ஒரு குழந்தையின் எதிர்காலத்தை உறுதி செய்ய அதிக செலவு செய்ய வேண்டியுள்ள நிலையில், பல பெற்றோரிடையே ‘நாம் இருவர் நமக்கு ஒருவர்’ என்ற மனநிலை வலுப்பெற்றுள்ளது.
கடந்த சில ஆண்டுகளில் தமிழ்நாட்டில் குழந்தைகள் பிறப்பு எண்ணிக்கை கணிசமாகக் குறைந்துள்ளது. 2019ம் ஆண்டு: மொத்தம் 9,45,842 குழந்தைகள் பிறந்துள்ளன (சராசரியாக ஒரு நாளைக்கு 2,591 குழந்தைகள்). இந்த ஆண்டு (மதிப்பீடு): டிசம்பர் மாதம் வரை 7,41,928 குழந்தைகள் பதிவு செய்யப்பட்டுள்ளன. இந்த ஆண்டு இறுதியில் சுமார் 7,80,000 குழந்தைகள் மட்டுமே பிறக்க வாய்ப்புள்ளது என மதிப்பிடப்பட்டுள்ளது (சராசரியாக ஒரு நாளைக்கு 2,138 குழந்தைகள்).
2019-ஆம் ஆண்டுடன் ஒப்பிடுகையில், கடந்த 6 ஆண்டுகளில் தமிழகத்தில் குழந்தைகள் பிறப்பு எண்ணிக்கை 18 சதவீதம் அளவுக்கு வீழ்ச்சி அடைந்துள்ளது. நாட்டில் ஒவ்வொரு ஆண்டும் 1.3% முதல் 1.5% வரை பிறப்பு விகிதம் அதிகரித்து வரும் சூழலில், தமிழகத்தில் மட்டும் சராசரியாக ஆண்டுக்கு 3.1 சதவீதம் அளவுக்குப் பிறப்பு விகிதம் வீழ்ச்சி அடைந்துள்ளது குறிப்பிடத்தக்கது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!