திருவொற்றியூர் நெடுஞ்சாலை இனி வள்ளலார் நெடுஞ்சாலை என பெயர் மாற்றம் - அரசாணை வெளியீடு!
தமிழக முதலமைச்சர் மு.க.ஸ்டாலின், வடசென்னையின் முக்கிய அடையாளங்களில் ஒன்றான திருவொற்றியூர் நெடுஞ்சாலைக்கு "வள்ளலார் நெடுஞ்சாலை" எனப் பெயர் மாற்றம் செய்து அரசாணை வெளியிட்டுள்ளார். ஆன்மீகவாதிகள் மற்றும் வள்ளலார் நெறியாளர்களின் நீண்ட கால கோரிக்கையை ஏற்று இந்த அறிவிப்பு வெளியாகியுள்ளது.
வள்ளலார் வாழ்ந்த மற்றும் போதித்த இடங்களுடன் தொடர்புடைய வடசென்னைப் பகுதியை கௌரவிக்கும் விதமாக இந்த நடவடிக்கை எடுக்கப்பட்டுள்ளது. தனது சமூக வலைதளப் பக்கத்தில் இது குறித்து பதிவிட்டுள்ள முதல்வர், "வள்ளலார் நெறியாளர்களின் கோரிக்கையை ஏற்று, திருவொற்றியூர் நெடுஞ்சாலைக்கு 'வள்ளலார் நெடுஞ்சாலை' எனப் பெயர் சூட்டப்படும் என்பதை மகிழ்ச்சியோடு அறிவிக்கிறேன்" எனத் தெரிவித்துள்ளார்.
அனைத்துலக வள்ளலார் மாநாடு 2026: வள்ளலாரின் உயரிய கருத்துகளை உலகெங்கும் கொண்டு சேர்க்கும் நோக்கில், வரும் பிப்ரவரி 15, 2026 அன்று சென்னை கீழ்ப்பாக்கம் ஏகாம்பரநாதர் பள்ளி வளாகத்தில் 'அனைத்துலக வள்ளலார் மாநாடு 2026' நடத்தப்படும் எனவும் அவர் அறிவித்துள்ளார்.
திமுக அரசு பொறுப்பேற்ற பிறகு வள்ளலாரின் புகழைப் பரப்பப் பல்வேறு நடவடிக்கைகளைத் தொடர்ந்து எடுத்து வருவதை முதலமைச்சர் தனது பதிவில் பட்டியலிட்டுள்ளார்: வள்ளலார் பிறந்த நாளை 'தனிப்பெரும் கருணை நாள்' என அரசு அறிவித்துக் கொண்டாடி வருகிறது.
வள்ளலாரின் 200-வது பிறந்த ஆண்டை முன்னிட்டு ஓராண்டு முழுவதும் தொடர் கொண்டாட்டங்களாக முப்பெரும் விழாக்கள் நடத்தப்பட்டன. கடலூர் மாவட்டம் மருதூரில் வள்ளலார் பிறந்த இல்லத்தைப் புனரமைத்து அரசு பாதுகாத்து வருகிறது. வடலூரில் சுமார் ₹100 கோடி மதிப்பீட்டில் 'வள்ளலார் பன்னாட்டு மையம்' அமைக்கும் பணிகள் நடைபெற்று வருகின்றன.
வடசென்னையின் பிரதான சாலைகளில் ஒன்றான இது, பாரிமுனை முதல் திருவொற்றியூர் வரை நீள்கிறது. வள்ளலார் தனது வாழ்நாளில் பலமுறை திருவொற்றியூர் வடிவுடையம்மன் கோயிலுக்குச் சென்று வழிபாடுகள் செய்துள்ளார். அவர் இயற்றிய 'திருவருட்பா'வின் பல பாடல்கள் இங்கிருந்து உருவானவை என்பதால், இச்சாலைக்கு அவர் பெயர் சூட்டப்படுவது பொருத்தமானது எனப் பக்தர்கள் வரவேற்றுள்ளனர். இந்த அறிவிப்பு ஆன்மீக அமைப்புகள் மற்றும் வடசென்னை மக்கள் மத்தியில் பெரும் வரவேற்பைப் பெற்றுள்ளது.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!