வாக்காளர் பட்டியல் திருத்தம்... திமுக இரட்டை நிலைப்பாடா?... எதிர்க்கட்சிகள் குற்றச்சாட்டு!
இந்தியத் தேர்தல் ஆணையத்தின் சிறப்பு தீவிர வாக்காளர் பட்டியல் திருத்தம் தமிழ்நாட்டில் அரசியல் சர்ச்சையை கிளப்பியுள்ளது. இந்த நடவடிக்கையை எதிர்த்து திமுக உச்ச நீதிமன்றத்தில் வழக்கு தொடர்ந்துள்ள நிலையில், மாநிலத்தில் நடைபெறும் திருத்தப் பணிகளில் ஆளும் கட்சி தலையிடுவதாக எதிர்க்கட்சிகள் குற்றம் சாட்டுகின்றன. சட்டரீதியாக எதிர்ப்பு தெரிவிப்பதோடு, களத்தில் ஒரே நேரத்தில் ஈடுபடுவது இரட்டை நிலைப்பாடு என விமர்சனம் எழுந்துள்ளது.
வாக்காளர் சரிபார்ப்பு என்பது தேர்தல் அதிகாரிகள் மட்டுமே மேற்கொள்ள வேண்டிய நிர்வாகப் பணி என எதிர்க்கட்சிகள் கூறுகின்றன. ஆனால், இந்தப் பணிகளில் திமுக நிர்வாகிகள் மற்றும் கட்சி ஊழியர்கள் செல்வாக்கு செலுத்துவதாக குற்றச்சாட்டு முன்வைக்கப்படுகிறது. இதனால், திருத்தப் பணிகளின் நடுநிலைமை பாதிக்கப்படுவதாகவும் அவர்கள் கூறுகின்றனர்.
தேர்தல் ஆணையச் சட்டத்தின் கீழ் வாக்காளர் பட்டியலைத் தயாரித்து திருத்தும் முழு அதிகாரம் இந்தியத் தேர்தல் ஆணையத்திற்கே உள்ளது. நகல் பதிவுகள், இடம்பெயர்வு, இறந்தவர்களின் பெயர்கள் பட்டியலில் தொடர்வது போன்ற சிக்கல்களை சரி செய்யவே இந்த சிறப்பு தீவிர திருத்தம் நடத்தப்படுகிறது. ஆனால், இந்த நடைமுறையில் அரசியல் தலையீடு உள்ளதா என்ற கேள்வி தற்போது விவாதமாகியுள்ளது.
சிறப்பு தீவிர வாக்காளர் பட்டியல் திருத்தப் பணிகளில் திமுக முகவர்கள் தாங்களாகவே படிவங்களை வழங்கி, சேகரித்து, சில இடங்களில் தேர்தல் அதிகாரிகளிடம் சமர்ப்பிப்பதாக எதிர்க்கட்சிகள் குற்றம் சாட்டுகின்றன. இதனால் அதிகாரப்பூர்வ இயந்திரத்தை ஓரங்கட்டி, ஆளும் கட்சி களத்தில் ஆதிக்கம் செலுத்துவதாக கூறப்படுகிறது. இது தொடர்பாக தமிழக தலைமைத் தேர்தல் அதிகாரி மற்றும் மாவட்ட தேர்தல் அதிகாரிகளிடம் முறையான புகார்கள் அளிக்கப்பட்டுள்ளதாக AIADMK, TVK உள்ளிட்ட கட்சிகள் தெரிவித்துள்ளன.
ஆனால், தேர்தல் ஆணையமும் தமிழக தலைமைத் தேர்தல் அதிகாரியும் இந்த குற்றச்சாட்டுகளை மறுத்துள்ளனர். தகுதியுள்ள வாக்காளர்களை காரணமின்றி நீக்க முடியாது என்றும், BLOக்களை அரசியல் கட்சிகள் இயக்க முடியாது என்றும் அவர்கள் விளக்கம் அளித்துள்ளனர். இதற்கிடையில், SIR நடைமுறையை எதிர்த்து திமுக உச்ச நீதிமன்றத்தில் மனு தாக்கல் செய்தது. நீதிமன்றம் தேர்தல் ஆணையத்தின் அதிகாரத்தை உறுதி செய்து, நடைமுறை வெளிப்படையாக இருந்தால் சட்டபூர்வமானதே என தெரிவித்தது.
தமிழ்நாட்டில் இந்த திருத்தத்தின் போது இறந்தவர்கள், இடம்பெயர்ந்தவர்கள், நகல் பதிவுகள் என பல ஆயிரம் பெயர்கள் கண்டறியப்பட்டுள்ளதாக அதிகாரிகள் கூறுகின்றனர். சென்னையில் மட்டும் 37 லட்சம் சரிபார்ப்பு படிவங்கள் விநியோகிக்கப்பட்டுள்ளன. திருநெல்வேலியில் சுமார் 78 ஆயிரம் பெயர்கள் நீக்கப்படலாம் என தெரிவிக்கப்பட்டுள்ளது. இதை அரசியலாக்கி மக்களிடையே அச்சத்தை ஏற்படுத்துவதாக எதிர்க்கட்சிகள் திமுகவை விமர்சித்து வருகின்றன.
ஆயுள் முழுவதும் ரூ.52,000 ஓய்வூதியம்! எல்.ஐ.சி.யின் அசத்தல் திட்டம்!
வீடியோ! 5 அடி முதலையை விழுங்கும் மலைப்பாம்பு!!
வீடியோ! ராஜநாகத்துடன் ஆக்ரோஷமாக சண்டையிடும் கோழி!!